احصل على تحديثات في الوقت الفعلي مباشرة على جهازك ، اشترك الآن.
تعالى يا خليلي تعالى
تعالى نبدلو هذا الحالة
نحيدو من العين الجلالة
من لحرار حنا سلالة
تعالى يا خليلي تعالى
لحرار ما يتباعو فالدلالة
ما يلبسونا الشمايت الدربالة
همتنا همة خيار الرجالة
ما نرافݣو منوالا
ما حنا كذابة ولا عمالة
الناس لينا تتوالى
تعالى يا خليلي تعالى
راه لبلاد علينا عوالة
حنا هل لمحبة ولوفا وتقالة
ما حنا عشاقة ولا ملالة
لاحد فينا عل الناس يتعالى
تعالى يا خليلي تعالى
ما يرضينا شي عايش فقصر
وشي مردوم فنوالة
شي منهم حفيان و شي لابس نعالة
اللي نفسو باردة
غير يدير لخلخال والسيالة
تعالى ياخليلي تعالى
نديرو حد بينا وبين القتالة
القوم النصابة والغفالة
لا يفرتكونا بحال حب لكبالة
تعالى ياخليلي تعالى
محمد الحاتمي