ليلنا طال وما صبح صباح
وذاتنا عليلة مليانة جراح
ما سرسرات ساعة الفلاح
ما ودن فلفجر ديك براح
سوقنا خارف ما فيه رباح
وصربتنا تتبورد بلا سلاح
دنيتنا غابة كثر فيها الصياح
ݣنازة كبيرة شاعلة بكا ونواح
واش لبكا عل اللي مشى وراح؟
ولا عل الي مازال ماجابتو رياح؟
واش لبكا على الظالم والسفاح؟
ولا على حال المسكين والسراح
الراعي شايف لغنم سايرة تتلاح
وهو نايم هاني البال ومرتاح
ليلنا طال ما صبح لو صباح
ونحلنا هجر الزهار وجباح
لمعنى باين ما يحتاج وضاح
كون لبيب يا صاح وكون لماح
محمد الحاتمي